《ꀉꁌꍸꇐꀋꁧꇇꊂ》

ꉪꏤꑌꀘꋊꃀꅉꉬꐛꅹ，ꀄꊭꃅꋍꑍꇯꆐꀘꂾꌧꇐꋋꈨꌋꆀꐮꇬꑌꑲꐨꀉꒉꃅꐥꅷꇁꌠ，ꑍꃀꑍꀉꄉꀘꂾꃆꃀꌌꃺꃶꑍꂷꌠꂘꄮꇬꆏꉡꑌꉢꎺꌌꇁꇬꎷ，ꀈꈥꀉꄉꐊꌞꅍꀘꁧꀋꋻꑴꇬ，ꋀꊇꀘꃆꃀꈧꌠꀉꑌꄹꁆꌠꆹꉢꈨꋺꌐ，ꋋꑌꀊꉘꄮꐰꎺꏣꑠꑵꃶꐚꃅꉾꌠꒉꄸ。ꃺꃶꑍꂷꌠꆹꀉꄉꐊꄉꈁꄽꀘꀐ，ꉡꆹꑍꀕꀉꄂꀉꄉꐊꄉꀘꋺ，ꀘꃆꃀꈧꌠꉢꈨꋺꌐꑴꇬ，ꀉꄉꐊꄉꀗꄮꇬꆏꃶꐚꃅꀊꅰꇫꋯꑲꀋꌦ，ꑊꏦꒉꄸꅀꑞꉬꀋꐚꃚꋒꇯꆏꀉꒉꃅꐕꀋꀬ。ꈬꈎꄹꈎꌠꆏ，ꉡꆹꐭꌶꅉꋍꊐꀕꌠꇬꄯꒉꀘꁧꀐ，ꀊꋨꄮꇬꆹꄯꒉꑠꑵꑠꉗꏢꀘꄎꎻꀋꈁ，ꉜꇈꂾꆏꋌꃢꇈꉈꆏꉡꆹꀉꄉꐊꄉꀘꀋꄐꀐꌠꉬꅊꇈ，ꐭꌶꅉꃘꈓ、ꐧꌷꅉꌕꈎ、ꐧꌷꅉꀊꂥꊐꌠꌕꈎ、ꒉꌶꅉꊐꌠꇖꈎ、ꎥꃪꌶꌺꊐꌠꌕꈎꆏꉡꆹꊯꈬꈎꌧꇐꂿꇐꊂꈹꐺꀐꌠꉬꅊꇈ，ꋋꊯꈬꈎꇢꊭꇬꋍꑍꑌꀉꄉꐊꄉꌞꅍꀘꀋꋻ，ꑠꃅꑴꇬꀘꂾꃆꃀꀋꉊꉢꎺꄉꈧꌠꀋꃅꀉꑌꄹꁆꌠꉠꉌꃀꐭꀕꍇꌠꇬꄉꅿꁯꇙꅷꐺꑴꌦ，ꋋꆹꉠꁍꉠꀿ、ꉠꀿꉠꃀ、ꉠꃺꉠꑌꈧꌠꉠꇬꁧꏖꌠꉬꋭ。

   ꀉꁌꀋꁧꀕꏖꐨꍇꌠꉠꉌꃀꇬꄉꇙꅷꐺꇬꎷꐛꅹ，ꒉꌶꅉꇬꄉꎥꃪꌶꌺꀘꐺꄮꇬ，ꀘꃆꃀꈧꌠꉢꎹꉢꈹꐯꇯꄉꌐ，ꋋꆹꋍꁁꏯꆏꉡꑌꀘꋊꃀꅉꌺꇖꉬꄉꋋꈨꎹꏾꈹꏾ，ꋍꁁꏯꆏꉠꊨꏦꑴꅉꑌꀘꂾꌧꇐꋋꈨꉌꃹꌠꒉꄸ。ꎥꃪꌶꌺꀗꄮꇬꀘꂾꏂꀨꀉꑌꈨꉢꎹꄉ，ꑠꉬꑴꇬꋍꑍꇇꆷꃅꄉꏂꀨꋐꉜꀋꋻ，ꀊꄶꏂꀨꈐꏭꁱꂷꈧꌠꑌꏮꇬꉚꇬꈍꃅꇠꌠꐯꀋꌧ。ꎥꃪꌶꌺꌶꅐꄉꌤꃅꇁꊂ，ꄮꈉꐤꄮꇬꆏꏂꀨꄯꒉꋋꈨꄆꇅꇬꄉꉢꅥꌊꀅꌳꃅꉜꇬꎷ，ꏂꀨꋋꈨꆹꉪꊇꀎꋏꀉꁌꀋꁧꈧꌠꈁꄽꑅꅐꊋꆜꄉꄻꅐꇁꌠꍸꇐꇇꊂꉬ。ꂴꆽꇬꂾꉜꄮꇬꆹꃶꐚꃅꊋꋠꐨꀉꒉꐯꀉꒉꃅꐥ，ꁱꂷꀑꑊꂶꌠꊿꌧꇬꑌꋍꄜꇐꊿꋌꀋꌧꌠꌐꀋꉆ，ꀊꅰꃅꀊꄶꏂꀨꈐꏭꀘꂾꊨꏦꉪꐨꃅꁱꄉꌠꑭꇇꉬꁆꃘꁆꅑ、ꀂꏾꌕꂷꇖꂷꎑꌠꁱꂷꈧꌠꊿꋋꇠꌊꌸꅉꌸꀋꄐ，ꋍꑍꀋꄿꑍꀕꃅꊋꇤꄉꉜꅷꇁꇬꆏꊌꐨꑌꋍꑍꋍꉙꃅꀉꒉꇁ。ꀘꂾꏂꀨꋋꈨꉜꇬꆏꌌꋊꍬꄉꌠꆈꌠꁱꂷꈧꌠꌋꆀꐯꄎꄉꉜꐛꅹ，ꉢꉜꎼꇁꇬꊋꋠꐨꋍꍈꀁꋌꒊꌠꌡ。

   ꈀꄸꉉꇬꑌꀘꂾꌧꇐꆹꆈꌠꌧꇐꈐꏭꀋꉬꀋꉆꐯꀋꉬꀋꉆꑵꌠꉬꄷ，ꀋꄸꄷꀘꂾꁰꁱꑠꑵꀋꐥ，ꀘꂾꑠꈨꀋꆏꃅꇬꊎꄉꆈꌠꌧꇐꀋꊪꀋꊛꑲꆏ，ꆈꌠꁰꁱꆹꈍꄮꇯꆐꀉꒉꃅꑍꀐꄷ，ꉈꑴꊿꌌꇫꄉꉉꇬ“ꌅꌧꄙꇖꀕ、ꃀꌧꏸꌋꀕ、ꀘꌧꀋꃷꎵ”ꄷꅇꂷꋋꇬꀕꄉꉜꎼꇁꇬ，ꀘꂾꌧꇐꆹꐊꇐꉐꑋꊏꃅꐥꌠꉬ，ꑠꃅꄉꄯꒉꏂꀨꁍꍸꇖꁵꇈ，ꃆꃀꉐꂷꑌꀿꈾꌺꈌꊐꇬꎷ。ꀘꂾꌧꇐꋌꑵꆹꆈꌠꊿꋅꋌꁯꁰꁱꈐꏭꀋꂿꑘꌠꐊꇐꑵꉬꌠꆹꈀꄸꑌꇫꅉꐚꑴꇬ，ꌧꇐꋌꑵꑞꐛꅹꇰꀋꃀ、ꑞꐛꅹꀋꃷꎵꌠꆹꃹꅼꃅꄉꇬꉚꇬꎥꀋꆹꑲꆏ，ꈍꄮꇬꑌꌧꇐꋌꑵꉇꇷꍈꀉꄂꊿꌧꇬꎷꌠ，ꌧꇐꈐꏭꉓꁱꅩꍅꄓ、ꂷꅑꂶꈯꀮꇗꀕꌠꐊꇐꈧꌠꆹꀊꄶꇬꄉꀀꃅꌣꇓꀕꇬꎷ。ꀋꈑꃺꃶꂘꃀꉉꇬ：ꆈꌠꐩꋊꏂꀨꄉꑳꈐꏭꏂꀨꄯꒉꄙꇁꉐꃅꎍꑴꇬ，ꌶꌺꇬꉚꇬꎥꌠꀋꐥꑲꆏꋌꎍꋍꃅꎍ，ꈍꄮꇬꆏꐩꋊꑭꐨꐊꄉꑍꀋꐚꄷ。ꃶꐚꃅꇬꉚꇫꅲꌠꀋꐥꑲꆏꌧꇐꁰꁱꈍꑋꐤꑌꀈꈥꐥ，ꀎꋏꊂꋊꑭꐨꄡꇗꊿꄝꐮꊂꈹꀋꄐꃅꎍꇬꎷ。ꉢꉪꉢꏢꃅꇬꆹ，ꀃꑍꋋꄮꄡꇗꀘꂾꀉꑌꈨꇬꊎꄉꁰꁱꊪꊛꅷꐺꇬꎷꑴꇬ，ꀘꂾꌧꇐꊪꊛꌠꆹꀘꂾꑴꅉꀉꄂꉬꄡꀋꑟ，ꀘꂾꌧꇐꉌꃹꌠꑌꀘꂾꊂꋊꀉꄂꉬꄡꀋꑟ，ꆈꌠꁰꁱ、ꀘꂾꁰꁱꉌꃹꌠꋍꏅꐋꀨꈀꄸꑌꐯꇯꊋꇤꄡꑟꌠ，ꀊꅰꃅꒉꌶꌺꌋꆀꎥꃪꌶꌺꈧꌠꏟꈯꃅꅼꇻꀕꌠꏂꀨꇢꊭꇬꄉꊨꑍꊨꈌꐊꄉꊨꈌꊱꆺꀕꄡꑟ、ꂿꑍꂿꈌꐊꄉꂿꈌꄄꃨꀕꄡꑟ，ꀋꃅꏂꀨꋋꈨꇬꄉꋊꍬꎼꇁꌠꆈꌠꁱꂷꋋꈨꆹꐯꇯꀉꁌꀋꁧꌧꇐ、ꌦꅪꌋꆀꇵꂷꌌꁱꅐꇁꌠꍸꇐꇇꊂꉬ，ꀋꄸꄷꉇꄅꇗꏦꌌꀘꂾꌧꇐꇱꄉꎥꃪꇬꆹꀊꅰꃅꐋꀋꌡꏭꃅꐙꌠ，ꈏꄅꉇꄅꁰꁱꌌꐯꌼꐯꀖꄉꎥꃪꇬꆹꊌꐨꀋꃷꃅꅏꑌꇮ，ꑠꃅꇬꑲꆀꎥꃪꏡꁈꏀꀺꇈꊌꐨꇣꋲꀕꌠꅐꇁꄎ。ꊿꋅꁯꍸꇐꁰꁱꈍꑋꐥꄿꂿꇬꉚꇫꅲꇬꎥꇬꃪꌠꀋꊌꑲꆏ，ꍸꇐꁰꁱꋋꈨꆹꄡꇗꀻꎆꌊꆸꅉꀋꊌ，ꀻꎆꀋꄐꑲꆏꅉꀕꃅꁧꐙꃅꈋꁡꇤꇬꄉꁮꐛꆰꀿꁧꈜꁮꌠꉬ。ꑠꅹ，ꀘꂾꌧꇐꉌꃹꇬꆹꉌꃀꌋꆀꈂꀸꌌꉌꃹꌠꀋꉬꃅ，ꏟꈯꃅꊨꏦꃅꐨꑽꑌꌌꄉꉌꃹꑲꆀꈻꇐꀉꒉꃅꐥꌠ，ꆎꑌꋍꍈꉜ、ꋋꑌꋍꍈꌧ、ꉡꑌꋍꍈꊌꑲꆏꁦꎆꆹꀐꌠ，ꄾꌦꋩꃅꊋꇤꄉꉜꌶ、ꀖꁉ、ꎥꃪ、ꄜꉺꑲꆏ，ꈍꄮꑌꄸꈐꈍꐰꃆꃀꒉꈾꌟꃅꈾ，ꄸꈐꈍꉈꁱꐭꉐꎳꏰꌺꋶꃅꋶꇁꌠ。

   ꌤꃅꌐꊂꄮꈉꐥꑲꆏꉡꆹꏂꀨꈧꌠꉢꌌꉜꇬꎷ，ꌤꃅꐋꀨꋍꈨꋋꈨꄹꇬꆏꌤꃅꅉꎹꄉꑲꆏꌧꇐꈨꌷꌊꑞꃅꂯꄷ，ꋍꈨꋋꈨꉉꇬꆏꆈꌠꌧꇐꆹꁌꇐꈤꌠꉨꊋꇤꄉꉜꄷ，ꊽꈭꊽꇍꌞꊿꈍꃅꉉꄿꂿ，ꉢꉜꇬꆹꊨꏦꃅꋭꍇꌠꃅ、ꊨꏦꃅꄎꍇꌠꃅꄉꑲꆏꍑꇬꎷꌠ。ꉢꉜꇬꉌꃹꐨꆹꇰꀋꃀꇈꎵꑳꀕꌠꉂꏣꏢꌡ，ꉡꆹꀋꎪꃅꉂꏣꋋꏢꎀꍹꌊꑞꅉꐛꅉꑟꆹꂿꉂ。ꀅꌳꃅꄉꉜꅷꇁꇬꑲꆀꉢꅉꐚꇬ，ꏂꀨꄯꒉꋋꈨꈐꏭꆹꋍꐊꇐꀉꄂꀉꑌꌠꀋꉬ，ꅇꇐꉏꑳꏡꁈꋓꌠꑵꌠꌌꁱꄉꌠꅇꂷꉐꂷꈧꌠꀘꅷꇁꇬꆏꀘꌐꊊꀋꉂ，ꀋꇊꆏꑬꊸꐝꇅꀕꌠꇂꃴꄉꀆꐒꐝꍠꀕꍔꅝꌠꌡ，ꑮꑟꅪꏷꅉꇬꄉꉌꐡꑘꀕꋍꊱꉙꌠꌡ，ꇤꈫꇤꇋꀉꁌꃀꌠꏢꁮꑌꄉꁮꅉꅲꌒꑠꂷꅲꌠꌡ。ꀊꅰꃅꉠꉌꃀꍇꌠꋌꈻꌊꁧꇬꎷꌠꆏ，ꀊꄶꅇꂷꋍꇬꈐꏭꄜꇐꁁꌧꁁꀋꌧꄮꇬꉌꃀꐭꀕꍇꌠꋌꌌꇬꇉꒉꈾꌟꃅꈾꇬꎷ，ꒉꈾꌟꃅꈾꐛꅹꏂꀨꋍꏾꁏꊂꉈꑴꋍꏾꁎꑟꉂ，ꊌꐨꋍꍈꊌꊂꉈꑴꋍꍈꊌꑟꉂ，ꉌꃹꐨꑠꍈꇬꊎꄉꉌꌤꑓꀖꅷꐺꇬꎷꐛꅹꉠꐥꐨꌋꆀꊌꐨꐯꇯꋌꌌꀊꅰꃅꐋꀋꌡꆹꇬꎷ。

   ꌧꇐꎹꈹꈝꃀꋋꏢꆹꈴꌐꇁꀋꉆꃅꎵꑳꀕꇬꎷ，ꄡꇗꀊꄶꈝꃀꋋꏢꇬꄉꄧꄹꊰꌠꇵꂷꈧꌠꑌꑋꊂꌕꆪꁧꄩꈵꆈꌟꃅꂷꅑꂶꈯꀮꇗꀕꎂꀕ，ꀊꄶꈝꃀꇬꑭꐨꄄꍅꀕꈧꌠꑌꊨꏦꐥꍂꎺꏣꈐꄉꌐꂷꐛꎂꀕ。ꃹꐨꈍꑋꅏꆏꊌꐨꈍꑋꊌ，ꇗꐾꃅꅍꎬꆏꇣꋦꋍꉻꏂ，ꊋꃤꌋꆀꉂꏣꌌꄉꌧꇐꎹꆏꁮꅉꉌꐡꅑꌠꐛ。ꀃꑍꀋꃅꉠꀉꄉꌋꆀꃺꃶꈧꌠꊾꂿꋍꈚꈴꄉꀘꅷꐺꑴꌦ，ꋀꊇꆹꀘꂾꃆꃀꊪꊛꈝꃀꋋꏢꇬꄉꑭꁘꋍꁘꎪꀋꋻ，ꈍꄮꑌꋀꈜꋀꍬꐾꑳꀕꇬꎷ；ꉡꑌꀉꄉꌋꆀꃺꃶꐊꄉꀋꀘꑴꇬ，ꉠꊨꏦꈝꃀꏡꌠꍬꌊꀘꂾꏂꀨꃆꃀꈐꏭꂵꇖꀕꌠꊿꋅꋋꁯꐩꋊꌋꆀꁮꅉꋒꌥꆹꂿꉂ。ꋌꃀꃅꌠꆹꑭꁘꑌꄔꀋꐽꑴꌦ，ꇵꂷꑌꅐꀋꇎꑴꌦ，ꊌꐨꑌꀁꑌꑴꌦ，ꀘꂾꆹꈁꎹꋬꂻꎹ，ꈁꎹꈨꅪꎹ，ꉡꑌꑭꐨꊛꄉꀉꁌꍸꇐꈐꏭꌕꋊꌕꀥꈃꅉꉜꂿꉂ，ꀋꁧꇇꊂꈐꏭꌕꃈꌕꅪꎔꅉꅲꂿꉂ。ꊌꉆꑲꆏ，ꀘꂾꌧꇐꉌꃹꌠꊂꋊꌺꇖꈧꌠꐯꇯꏂꀨꈬꇬꄉꀃꌋꀊꆨꀉꁌꀋꁧꑭꐨꈧꌠꊼꇅꐪꌦꁖꉩꆹꎻꑟ。